小編經常聽到好多人話，玩鐵人要玩十幾個鐘，咁辛苦咪搞。
咁其實係咪每個鐵人賽都要玩十幾個鐘？
今日就同大家介紹下三項鐵人賽嘅距離啦！
—————————————————
先講下香港經常會參加到嘅比賽距離
繽紛距離(Fun Distance)：游水375米 > 單車10公里 > 跑步2.5公里
半奧運距離(Sprint Distance)：游水750米 > 單車20公里 > 跑步5公里
奥運距離(Olympic Distance)：游水1500米 > 單車40公里 > 跑步10公
本地比賽仲有一系列水陸兩項或陸上兩項比賽，即只需要游水+跑步 或 跑步+單車，參加比賽門檻其實無想像中咁高。
再睇睇個距離，實際由1小時內完成至約4小時完成，無大家嘅誤解下下十幾個鐘咁誇張。
———————————————————
拉闊啲個畫面，再睇下外地嘅大型賽事，距離又係幾多呢❓
就以大家最熟悉嘅台灣鐵人賽為例，分別就有半鐵(half-ironman / 70.3) 同 大鐵(ironman / 226)兩個距離。
Half-Ironman：游水1900米 > 單車90公里 > 跑步 21公里(半馬)
Ironman：游水3800米 > 單車180公里 > 跑步42公里(全馬)
Half-Ironman現時最快完成時間係3小時29分，一般香港選手完成時間約5小時30分-6小時30分，所以，都未到嚇親人嘅十幾個鐘，因為賽事8小時30分就會Cut-off。
Ironman現時最快完成時間係7小時35分39，現時有一位香港本地選手能夠造到sub 10成績，其餘香港運動員平均完成時間約12-14小時，大會Cut-off時間為17小時。
題外話，小編都玩過half-ironman，最快時間係2012年新加坡比賽sub 5，都算見得下人，因為當年未及而家咁普及。
隨住運動員不斷挑戰極限，近年都有比Ironman更長距離(連續比賽幾日)或更具挑戰性路段嘅賽事岀現，例如有係北歐較為寒冷地方進行嘅比賽，或者有單車及跑步賽段爬升多嘅賽事。
———————————————————
小編講咁多，其實都係想話你知，三項鐵人並唔係想像中咁遙不可及，其實係有啲好易入門嘅比賽距離俾大家嘗試，大家不妨參考一下，為2021定立一個鐵人目標！
希望下次比賽見到你啦！
———————————————————
今次講住咁多先，覺得資訊啱用，記住Share上Facebook俾多啲朋友仔見到❤️
下一篇小編將會介紹【XTERRA越野三項鐵人】，記得留意❗️
Comments