比賽規例3.0，Leo會同大家講下轉項區
World Triathlon二級裁判 - 巫思遠(Leo)
-前香港三項鐵人代表
-World Triathlon二級教練
-香港三項鐵人總會二級教練及裁判
-2004年到今為香港賽事擔任大會裁判
玩開鐵人嘅朋友對轉項區應該一啲都唔陌生，但係無玩過鐵人，就未必知係咩嚟...
轉項區係三項鐵人比賽不可或決部分，運動員所需比賽用品都會放係轉項區，包括：單車、跑鞋等等...而每位運動員都有一個比賽號碼，所有物品都要放係自己號碼範圍
比賽規例3.0：於轉項區內擺放的個人比賽物品
其實除咗比賽用品之外，運動員其他物品都應該存放係行李寄存區或者交由別人保管，目的係為左保持轉項區內暢通，有助運動員進行轉項，如果轉項區內放滿背囊，運動員活動就會受阻拎車同放車都會成為問題。
講番轉項區，大家都知要跟比賽號碼掛單車，而掛單車其實係有特定規則
以傳統單車架為例，即係一枝架掛到五至六部車果種，T1係需要將單車座位前端勾喺單車架橫杆上面，而車頭係需要指向轉向區通道方向，而T2番黎放低車就可以有兩種選項，一就係要將兩邊剎車掣完全勾喺橫桿上面，二就係將座位勾喺橫杆上面，而呢兩種方法都需要將單車放喺你號碼掛牌嘅左右0.5米範圍入面
如果係獨立式單車架就易處理得多，T1就一定係以後轆放入單車架，而T2放車就可以用任何一隻轆放入去就可以啦。
如果你係打算將頭盔或者車鞋放喺地面嘅話，要留意番擺放位置唔可以超過你掛架上面個號碼牌，垂直落地下計左右兩邊0.5米嘅範圍啦。
觸犯於指定地點外擺放或儲存比賽用品有以下罰則：
分齡組 警告及修正
精英及傷健組(半程或以下距離) 10秒
精英及傷健組(標準距離) 15秒
同上落車一樣，情況許可之下嘅分齡組賽事，裁判係會用Stop and Go嘅方式對你作出警告同要求修正，而如果同時太大班人一齊出入轉項區，裁判亦都有權將處罰移交俾處罰區處理，而告示板上面將會以「E 」字來代表。
參考：World Triathlon Competition Rules
Sec. 7 Transition - 7.1 b, c
Sec. 33 Appendix K - 59
相片來源：網上圖片
Comments