2020年12月3日已讀 2 分鐘

【疫情下的鐵人魂(四) - 嘉倫教練】

2020新冠肺炎全球大爆發，多項防疫措施實行，令好多運動員訓練大受影響

- 參與三項鐵人年資約18年

- 教練工作年資12年

- World Triathlon二級教練

- Go Goal Sports教練

疫情前，連續有3年多時間全神貫注係工作方面，運動嘅機會都係教訓練班時一齊踩單車，除左工作，其餘時間都放到家庭生活，訓練都擺埋左一邊，整體訓練量少之又少，更無training plan可言

另外，小學開始參加運動比賽，一段好長嘅時間，近年對成績，對獎項嘅追求又好似比從前少，推動力大不如前

近年最有計劃嘅訓練已經係2018年尾開始準備2019台東70.3賽事，每星期約8-10小時，其實時數仍然好少，所以當日比賽成績已經係自我感覺良好

疫情前訓練量：每星期大約3小時

疫情中，因應防疫措施，工作暫停，反而訓練時間增加，當時有限聚令，有戶口戴口罩等規則，所以經常係公司，一個人踩單車機、跑步同做體能，每日都做大約2小時，感覺體能上都有所提升

到疫情放緩時，戶外運動唔需要戴口罩，就較多到戶外練單車，跑山等等，睇番自己嘅應用程式嘅記錄，去年同期基本上無跑過步，今年就每星期有30km里數

今年因為疫情，工作少左，加上屋企兩個小朋友停課，陪小朋友嘅時間多左，以往工作上，特別週末會比較忙，可以陪仔女去玩嘅時間不多

藉住今次機會，教識左大女踩單車，有幾次我跑佢踩單車，距離愈來愈長，有一次同個女去烏溪沙，我來回跑左18km，又可以練習又可以陪小朋友，一舉兩得

細佬亦玩緊平衡車，因為停課玩多左，我又可以跑步陪佢，又係一舉兩得嘅機會

不知不覺，隨著陪小朋友嘅時間愈來愈多，跑步里數亦都不斷上升，以前比賽比到無乜感覺，2020一場比賽都無參加過，而家好想參加比賽，我團鐵人火番嚟啦